Innlent

Íslensku safnaverðlaunin 2008 til Byggðasafns Vestfjarða

Byggðasafn Vestfjarða hlaut Íslensku safnaverðlaunin 2008 sem Ólafur Ragnar Grímsson afhenti á Bessastöðum í dag. Félag íslenskra safna og safnmanna og Íslandsdeild ICOM - alþjóðaráðs safna, standa saman að verðlaununum og hafa þau verið veitt frá árinu 2000. Þetta kemur fram í fréttatilkynningu frá byggðasafninu.

Þar segir enn fremur: „Markmið verðlaunanna er að vekja athygli á söfnum og safnastarfi sem þykir til fyrirmyndar. Í ár var kallað eftir ábendingum frá almenningi og bárust rúmlega sextíu ábendingar. Dómnefnd tilnefndi síðan þrjú söfn til verðlaunanna; Byggðasafn Vestfjarða, Minjasafnið á Akureyri og Safnasafnið á Svalbarðsströnd.

Byggðasafn Vestfjarða er einstakt safn í sinni röð og þykir sinna hlutverki sínu á frumlegan og metnaðarfullan hátt. Varðveisla og uppbygging húsakosts safnsins er til fyrirmyndar, þátttaka í rannsóknarstarfi markviss og þjónusta við gesti með þeim hætti að heimsókn í safnið er einstök upplifun.

Áherslan á báta og bátavélar

Kristín Guðnadóttir, formaður Íslandsdeildar ICOM, flutti rökstuðning dómnefndar. Dómnefnd er skipuð fulltrúum félaganna auk formanns sem er fulltrúi þess safns sem síðast hlaut verðlaunin. Í ár var formaður dómnefndar Guðný Gerður Gunnarsdóttir borgarminjavörður og forstöðumaður Minjasafns Reykjavíkur sem hlaut verðlaunin árið 2006 m.a. fyrir Landnámssýninguna Reykjavík 871 + /- 2 við Aðalstræti. Verðlaunin eru veitt annað hvert ár.

Byggðasafn Vestfjarða leggur áherslu á að safna bátum og bátavélum og hefur valið þá leið við varðveislu báta að halda þeim sjófærum, sem er heldur óvenjulegur máti að sýna safnkostinn. Safnið hefur umsjón með elsta slipp landsins og stuðlar þannig að því að varðveita verkþekkingu við bátasmíðar. Með þessu fá bátarnir nýtt líf og sýnir það djörfung og metnað þeirra sem stýra safninu að velja þennan hátt við varðveislu báta.

Árið 2005 var tekinn í notkun fyrsti áfangi nýs safnhúss, þar sem eru geymslur og verkstæði og þar er safngripum búin góð aðstaða. Við hönnun nýja hússins var tekið mið af umhverfinu og þess gætt að það falli vel að eldri byggð í Neðstakaupstað. Með nýja húsinu er tryggð framúrskarandi aðstaða til innra safnastarfs sem er jafn mikilvægur hverju safni og það sem alla jafna ber meira á."





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.