Guðmundur Steinarsson í landsliðið

Ólafur Jóhannesson landsliðsþjálfari hefur valið Guðmund Steinarsson úr Keflavík í hóp sinn fyrir leikina gegn Norðmönnum og Skotum í undankeppni HM og kemur hann inn í stað Ólafs Inga Skúlasonar sem er meiddur.

Guðmundur hefur farið mikinn með toppliði Keflavíkur í sumar og er markahæsti leikmaður deildarinnar með 14 mörk, en Ólafur Ingi, sem leikur með Helsingborg, meiddist í leik með liði sínu í gær.

Ólafur sagðist í samtali við fotbolti.net í dag óttast að hann væri með slitið krossband á hægra hné, en hann mun fara í myndatöku á morgun þar sem skorið verður úr um það.