Við erum í hamingjukasti

"Ég var i salnum í gær og þvílík stemning. Tár, gæsahúð og öskur hjá íslenska hópnum," segir Birna Björnsdóttir danshöfundur þegar Vísir spyr hana út í gærkvöldið þegar ljóst var að Ísland myndi syngja í úrslitakeppni Evróvisjón.

Birna sér alfarið um sviðshreyfingar og stöður fyrir alla í Eurobandinu á sviðinu í Belgrad.

"Í dag eru svo tvær æfingar og önnur á morgun. Við erum í hamingjukasti. Þetta verður bara flott. Þau eru svo prófessjónal og það er frábært að vinna með þeim hérna."

"Það er búið að ganga svakalega vel. Hér er frábær vinnuhópur á ferð. Við hlæjum mikið og erum í góðum fíling."