Tómas hetja Fjölnismanna

Það vantaði ekki dramatíkina í undanúrslitaleik Fylkis og Fjölnis í VISA-bikar karla í gær. Flest benti til þess að grípa þyrfti til framlengingar þegar Fjölnismaðurinn Tómas Leifsson skoraði sigurmarkið þegar tæpar tvær mínútur voru komnar fram yfir venjulegan leiktíma.

„Ég er bara ennþá að ná mér. Ég tók ekkert eftir því að það væri svona lítið eftir af leiknum, þannig að það var hrikalega sætt að vinna með þessum hætti," segir hetja Fjölnismanna, Tómas Leifsson.

Leikurinn fór tiltölulega rólega af stað á upphafsmínútunum, en það átti heldur betur eftir að breytast.

Fyrsta mark leiksins kom á 17. mínútu þegar Fjölnismaðurinn Gunnar Már Guðmundsson skoraði gott mark eftir þríhyrningsspil við Tómas Leifsson.

Fylkismenn jöfnuðu leikinn eftir hálftímaleik. Varnarmenn Fjölnis náðu þá ekki að hreinsa boltann úr vítateig sínum og Kjartan Ágúst Breiðdal mætti á fjærstöngina og skoraði af stuttu færi.

Fylkismenn tóku svo forystu stuttu síðar þegar varnarmaðurinn Þórir Hannesson brá sér í sóknina og skallaði einn og óvaldaður sendingu Ians Jeffs í netið. Fylkismenn voru þó ekki lengi í paradís, því þremur mínútum eftir að hafa skorað varð varnarmaðurinn Valur Fannar Gíslason fyrir því óláni að skora sjálfsmark.

Varnarmistök Fylkis voru hins vegar ekki úr sögunni því stuttu síðar átti Þórir mjög slaka spyrnu sem barst beint í hlaupalínu Péturs Georgs Markan, sem slapp inn fyrir vörnina og þakkaði fyrir sig með því afgreiða boltann í netið framhjá Fjalari. Staðan var 2-3 í hálfleik í fjörugum leik.

Það dró til tíðinda á 67. mínútu þegar Fjölnismenn gerðu tilkall til vítaspyrnu þegar stuggað var við Kristjáni Haukssyni í vítateignum. Dómarinn, Valgeir Valgeirsson, kaus að flauta ekki en í næstu sókn náðu Fylkismenn svo að jafna leikinn. Varamaðurinn Heimir Snær Guðmundsson gerði sig sekan um slæma sendingu sem Ian Jeffs komst inn í og átti gott skot sem Þórður réði ekki við.

Allt var í járnum á lokamínútunum og leikmenn liðanna virtust vera búnir að sætta sig við að grípa þyrfti til framlengingar þegar Tómas skoraði sigurmarkið. Tómas fékk sendingu frá varamanninum Davíð Þór Rúnarssyni og skoraði sigurmarkið þegar tæpar tvær mínútur voru komnar fram yfir venjulegan leiktíma.

Stuttu síðar var svo flautað til leiksloka og Fjölnir komið í úrslitaleikinn annað árið í röð og í annað skiptið í sögu félagsins. „Það sem stendur upp úr hjá mér er karakterinn sem við sýndum og við þurfum að byggja á því. Við erum bara bikarlið og núna ætlum við alla leið," segir sigurreifur Ásmundur Arnarsson, þjálfari Fjölnis.

Sverrir Sverrisson var að stýra Árbæingum í sínum fyrsta leik eftir að hafa verið ráðinn þjálfari á dögunum. Hann dregur ýmislegt jákvætt frá leiknum. „Menn voru að leggja sig fram og það er líka jákvætt að við erum að skora meira en oft áður í sumar."