Áttræður situr uppi með ónýtan bíl

Ökumaður klessti á kyrrstæðan bíl manns á áttræðisaldri við Hraunbæ í Reykjavík fyrir helgi og stakk af. Bíllinn er ónýtur og situr eigandi bílsins uppi með tjónið gefi ökumaðurinn sig ekki fram.

Valdimar Ásgeirsson sem er á áttræðisaldri lagði bílnum sínum fyrir utan Skátaheimilið í Hraunbæ í lok vikunnar og kom að honum klesstum hálftíma síðar. Ökumaðurinn sem klessti á bílinn stakk af. Stýribúnaður bílsins er mikið skemmdur og er bíllinn talinn ónýtur. Lögreglan hefur talað við fjóra sem voru vitni að atvikinu. Talið er að tveir karlmenn í kringum tvítugt hafi verið þar á ferð á bláum Ford mustang.

Vitni segja að ökumaðurinn hafi verið á allt að hundrað kílómetra hraða en hámarkshraði í götunni er 30 kílómetrar. Valdimar situr uppi með tjónið gefi hann sig ekki fram.

Málið er í rannsókn en þeir sem þekkja til málsatvika eru hvattir til að hafa samband við lögreglu.