Framsóknarmenn saka Vg og Samfylkingu um klæki

Stjórnir kjördæmissambands framsóknarmanna í Reykjavík, Framsóknarfélags Reykjavíkur og Félags ungra framsóknarmanna í Reykjavík styðja Óskar Bergsson og ákvörðun hans að ganga til samstarfs við Sjálfstæðisflokkinn í Reykjavík.

Félögin funduðu í hádeginu og í yfirlýsingu fundarmanna segir að óviðunandi staða hafi verið komin upp fyrir borgarbúa vegna meirihlutasamstarfsslita Sjálfstæðisflokks og F-lista. Við það hafi ekki verið hægt að una og því hafi þurfti að leita leiða til að mynda starfhæfan meirihluta í Reykjavík og tryggja nauðsynlega festu við stjórn borgarinnar út kjörtímabilið.

Framsóknarmenn segja að fullyrðingar um mögulegt meirihlutasamstarf Tjarnarkvartettsins hafi byggst á tálsýn og klækjum Samfylkingar og Vinstri grænna sem hafi afhjúpast þegar sögusagnir hafi verið dregnar til baka þegar á gærdaginn leið.

„Þá lá fyrir þegar í maí sl. að ekki væri samstaða í minnihlutanum um uppbyggingu í atvinnumálum. Óskar Bergsson stóð einn að tillögu um áframhald undirbúnings að Bitruvirkjun sem Vinstri græn og Samfylking lögðust alfarið gegn. Þessi afstaða flokkana var ítrekuð í samtölum milli manna í gærdag," segir í yfirlýsingunni.