Guðjón Valur markakóngur á HM

Guðjón Valur Sigurðsson varð markahæsti leikmaðurinn á HM í Þýskalandi og skoraði hann 66 mörk í 10 leikjum, 9 mörkum meira en Tékkinn Philip Jicha sem reyndar spilaði aðeins 8 leiki á mótinu. Pólverjinn Karol Bielecki skoraði 56 mörk og stórskyttan Koksharov frá Rússlandi varð þriðji með 55 mörk. Íslenska liðið átti 5 af 10 markahæstu mönnum mótsins.

Snorri Steinn Guðjónsson og Ólafur Stefánsson skoruðu 53 mörk hvor á mótinu og sitja í fimmta sæti ásamt hinum magnaða Ivano Balic frá Króatíu og þeir Logi Geirsson og Alexander Petersson skoruðu 48 mörk hvor og eru í tíunda sætinu yfir markahæstu menn mótsins. 

Þess má geta að Guðjón Valur skoraði aðeins eitt marka sinna úr vítakasti á meðan flestir þeirra markahæstu skoruðu stóran hluta marka sinna af vítalínunni.