Sjúkrabíll í hörðum árekstri í útkalli

Harður árekstur varð á Eyrarbakkavegi um fimmleytið í nótt þegar fólksbíl var ekið í veg fyrir sjúkrabíl á leið til Þorlákshafnar. Lögregla hafði kallað á sjúkrabílinn vegna líkamsárásar sem átti sér stað á dansleik í Þorlákshöfn en þar var meðal annars sparkað í höfuð manns.

Á leiðinni til Þorlákshafnar var bíll á undan sjúkrabílnum sem fór eilítið út í kant. Þegar sjúkrabíllinn, sem var með blikkljósin á, hugðist taka fram úr honum tók ökumaður bílsins hins vegar vinstri beygju þannig að bílarnir tveir skullu harkalega saman og enduðu báðir utan vegar. Enginn slasaðist þó í árekstrinum.

Lögreglumenn sem staddir voru í Þorlákshöfn óku hins vegar með þann sem varð fyrir árásinni til móts við annan sjúkrabíl og var manninum komið undir læknishendur á Heilbrigðisstofnun Suðurlands þar sem gert var að sárum hans. Lögregla veit hver árásarmaðurinn er og verður hans líklega vitjað í dag.