Tveir úr FH dæmdir í bann

Danirnir Tommy Nielsen og Dennis Siim verða ekki með Íslandsmeistaraliði FH þegar það heimsækir Breiðablik sunnudaginn 16. september. Aga- og úrskurðarnefnd KSÍ fundaði í dag og fengu þeir báðir leikbann vegna uppsafnaðra áminninga.

Olgeir Sigurgeirsson verður í banni hjá Breiðabliki í umræddum leik. Þrír aðrir leikmenn úr Landsbankadeild karla voru úrskurðaðir í leikbann í dag vegna uppsafnaðra áminninga.

Valur Fannar Gíslason verður í leikbanni þegar Fylkir tekur á móti hans fyrrum félagi Fram. Sóknarmaðurinn Þórður Birgisson leikur ekki með HK í mikilvægum leik gegn KR og þá verður ÍA án Helga Péturs Magnússonar gegn Valsmönnum.