FH-ingar lágu í Kaplakrikanum

FH-ingar töpuðu í kvöld fyrir Bate frá Hvíta-Rússlandi í fyrri leik liðanna í 2. umferð Meistaradeildar Evrópu, 1-3. FH-ingar komust yfir á 3. mínútu með marki frá Matthíasi Vilhjálmssyni en Hvít-Rússarnir náðu að jafna á 31. mínútu. Staðan var 1-1 í hálfleik, en leikmenn Bate náðu að setja tvö mörk í seinni hálfleik.

Leikmenn Bate voru mun sterkari í fyrri hálfleiknum og spiluðu góðan bolta. FH-ingar voru heppnir að fá ekki mark á sig á 20. mínútu þegar Tommy Nielsen gerði sig sekan um slæm varnarmistök sem varð til þess að leikmaður Bate komst í dauðafæri en Guðmundur Sævarsson bjargaði þá á marklínu.

Í seinni hálfleik sýndu FH-ingar þó úr hverju þeir eru gerðir og voru óheppnir að fá á sig tvö mörk. Þeir áttu þá nokkrar góðar sóknir og var meðal annars dæmt mark af Matthíasi Vilhjálmssyni vegna rangstöðu, en það virtist þó vera réttur dómur.

Það er ljóst að FH-ingum bíður erfitt verkefni þegar þeir ferðast til Hvíta-Rússlands, en þar verða þeir að skora að minnsta kosti þrjú mörk.