Casper gerir samning við Breiðablik út 2008

Knattspyrnudeild Breiðabliks hefur framlengt samning við markvörðinn Casper Jacobsen sem verið hefur hjá félaginu frá því í byrjun júní þar sem Hjörvar Hafliðason þurfti að gangast undir aðgerð vegna meiðsla. Samningurinn gildir út keppnistímabilið 2008.

Casper hefur staðið sig með stakri prýði milli stanganna hjá Breiðabliki og var því ákveðið að framlengja samning hans. Framundan er því samkeppni um markvarðarstöðuna hjá Breiðabliki en hjá félaginu er einnig Vignir Jóhannesson, markvörður U-17 ára landsliðs Íslands.

Casper Jacobsen er 28 ára og hefur leikið átta leiki fyrir Breiðablik í sumar. Hann hóf feril sinn hjá Viborg FF á Jótlandi þar sem hann var frá fimm ára aldri og fram til 23 ára aldurs eða ársins 2002 þegar hann gekk til liðs við Aarhus AGF. Hann sneri aftur til Viborg vorið 2004 en lék síðan í þriðju deildinni í Danmörku árið 2005. Veturinn 2006 fór hann til Aalborg þar sem hann var varamarkvörður þar til hann gekk til liðs við Breiðablik.