Ragna í undanúrslit í Grikklandi

Ragna Ingólfsdóttir komst í morgun í undanúrslit á alþjóðlegu badmintonmóti í Grikklandi. Hún vann Karin Schnaase frá Þýskalandi örugglega í fjórðungsúrslitunum, 21-10 og 21-13.

Ragna var fyrir mótið sett í þriðja sætið í styrkleikaröðun þátttakenda en hún mætir á morgun Nhung Le frá Tælandi í undanúrslitum.

Le lagði í morgun Grace Daniel frá Nígeríu í fjórðungsúrslitum en Daniel lagði í 16-liða úrslitum næststerkasta keppanda mótsins, Agnese Allegrini frá Ítalíu.

Le er í 93. sæti heimslistans en Ragna er í 55. sæti á sama lista.

Sá keppendi sem er talin sterkastur, Petya Nedelcheva frá Búlgaríu, hefur ekki átt í neinum vandræðum með að komast í undanúrslitin og unnið alla sína leiki örugglega.

Hún mætir Karinu Jörgensen frá Danmörku í undanúrslitunum og sigurvegarinn í þeirri viðureign mætir annað hvort Rögnu eða Le í úrslitaviðureigninni á laugardaginn.