Viljum ná stoltinu til baka

„Eftir síðustu ófarir viljum við fyrst og fremst ná stoltinu til baka og sýna það hvað í okkur býr," sagði Hermann Hreiðarsson í samtali við Arnar Björnsson í kvöldfréttum Stöðvar 2. Hermann verður fyrirliði Íslands í leiknum gegn Dönum á morgun.

„Við mætum hingað til að gefa hundrað prósent í þetta," sagði Hermann. Lítill áhugi er fyrir leiknum í Danmörku og talið er að Parken verði ekki mikið meira en hálfmannaður.

Ólafur Jóhannesson, landsliðsþjálfari, hefur lagt áherslu á varnarleikinn á æfingum fyrir leikinn. „Því lengur sem við náum að halda okkar marki hreinu þá tel ég okkar möguleika verða stærri. Danirnir eru að spila fyrir stoltið og ætla að sýna þjóð sinni að þeir eru betri en þetta. Þjóðin er mikið á móti þeim," sagði Ólafur við Stöð 2.

Fyrr í kvöld tilkynnti Ólafur sitt fyrsta byrjunarlið en Ísland mun leika leikkerfið 4-5-1. „Það byrja allir með hreint borð hérna og svo er það þeirra að sýna að þeir séu þess verðugir að vera valdir aftur. Þeir vita það," sagði Ólafur.