Ólafur óttast ekki danska liðið

Landsliðið æfir af krafti fyrir leikinn gegn Dönum á miðvikudag og voru tvær æfingar á dagskrá liðsins í dag. Ólafur Jóhannesson er að fara að stýra liðinu í fyrsta sinn og hefur varnarleikurinn verið vel æfður.

„Undirbúningurinn hefur gengið mjög vel. Við erum búnir að æfa kannski meira en hefur gerst áður. Það er vegna þess að við erum náttúrulega nýir þjálfarar og þurfum að kynnast þessu. Æfingarnar hafa gengið vel og ég er mjög sáttur," sagði Ólafur í viðtali í fréttum Stöðvar 2.

„Við förum vel yfir varnarleikinn og svo verða menn að hafa áhuga og vilja til að gera það sem þeir eiga að gera. Mér finnst menn vera mjög tilbúnir í slaginn og þeir eru tilbúnir að gera betur en í síðustu leikjum."

En óttast Ólafur danska liðið? „Nei ég geri það ekki. Ég geri þær kröfur að menn geti gengið stoltir af velli. Ég tel okkur eiga ágætis möguleika í þessum leik," sagði Ólafur Jóhannesson.