KR og Keflavík í úrslitaleikinn

Það verða KR og Keflavík sem munu mætast í úrslitaleik VISA-bikars kvenna sem fram fer á Laugardalsvelli 22. september. Undanúrslitaleikirnir fóru fram í kvöld en þar vann KR 7-3 sigur á Breiðabliki á útivelli og Keflavík vann Fjölni 3-1 á heimavelli sínum.

KR hafði 4-1 yfir í hálfleik á Kópavogsvelli en þar var Olga Færseth í aðalhlutverki og skoraði öll fjögur mörk liðsins. Hómfríður Magnúsdóttir bætti við tveimur mörkum í seinni hálfleiknum og Katrín Ómarsdóttir einu. Greta Mjöll Samúelsdóttir, Mette Olesen og Sandra Sif Magnúsdóttir skoruðu mörk Breiðabliks.

KR hefur mjög öflugt sóknarlið og hefur haft gott tak á Breiðabliki í sumar. Alls hefur liðið skorað sautján mörk í þremur leikjum gegn Kópavogsliðinu í deild og bikar í ár. Blikastúlkur unnu Val í síðustu umferð bikarsins en það verða hinsvegar KR-stúlkur sem leika í úrslitaleiknum eftir rúman mánuð.

Þar mun KR leika gegn Keflavík sem vann Fjölni 3-1 í hinum undanúrslitaleiknum. Vesna Smiljkovic og Danka Podovac skoruðu í fyrri hálfleiknum og staðan 2-0 í hálfleik. Podovac bætti síðan þriðja marki Keflavíkur við áður en Rúna Stefánsdóttir minnkaði muninn fyrir Fjölni.