Gunnlaugur: Eyðileggjum titilvonir Valsmanna í kvöld

Gunnlaugur Jónsson, fyrirliði KR, segir í samtali við Vísi að gott andrúmsloft sé í herbúðum liðsins fyrir komandi átök í fallbaráttu Landsbankadeildarinnar. KR-ingar mæta Valsmönnum á heimavelli í kvöld og greinilegt að leikurinn er mjög mikilvægur fyrir bæði lið þar sem Valsmenn eru í harðri toppbaráttu í deildinni, en KR situr á botni deildarinnar.

Gunnlaugi hafði ekki verið tilkynnt hvernig liði KR verði stillt upp í kvöld en hann segist búast við að liðið spili framar á vellinum en það hefur gert í sumar. Leikurinn í kvöld verður fyrsti deildarleikur KR undir stjórn Loga Ólafssonar.

„Við höfum fulla trú á því að við björgum okkur úr fallsætinu áður en yfir lýkur," sagði Gunnlaugur. „Það kemur ekkert annað en sigur til greina í kvöld, og þar með að eyðileggja titilvonir Valsmanna."