Sakar Kompás og Fréttastofu Stöðvar 2 um óvönduð vinnubrögð

Framkvæmdastjóri Landssambands Íslenskra Útgerðarmanna skrifar í nýjasta tölublaði Fiskifrétta grein um það sem hann kallar óvönduð vinnubrögð starfsfólks Kompáss og fréttastofu Stöðvar 2.

Í greininni er hann að fjalla um aðdraganda kosninga til Alþingis og beinir til að byrja með spjótum sínum að Frjálslynda flokknum. Hann segir fátt hafa komið á óvart í aðdraganda kosninganna. „Áfram reyndi einn stjórnmálaflokkur að slá sér upp með því að rakka niður íslenska fiskveiðistjórnun," segir Friðrik.

„Það sem helst kom á óvart var það hversu óvönduð vinnubrögð voru viðhöfð í Kompásþætti og á fréttastofu Stöðvar 2 skömmu fyrir kosningarnar í garð íslensks sjávarútvegs og fiskveiðistjórnunar. Væntanlega var tímasetningin á mjög neikvæðri umfjöllun algjör tilviljun en þar mátti helst skilja að eintómir glæpamenn og svíðingar starfi í greininni."

Þá rekur Friðrik það sem hann kallar rangfærslur sem fram hafi komið í þættinum. Hann segir ennfremur að í framhaldi af Kompásþættinum hafi komið fram ásakanir á hendur sjávarútvegsfyrirtæki án þess að nokkið lægi til grundvallar annað en órökstuddar fullyrðingar sem ekki hafi staðist nánari skoðun.

Samt hafi fréttastofa Stöðvar 2 séð „ástæðu til að birta „fréttina og ráðast að mannorði þess fólks sem á viðkomandi fyrirtæki og rekur. Mér finnst rétt að rifja þetta upp í ljósi þess að stórir eigendur fréttastöðvarinnar hafa um árabil staðið í málaferlum sem áttu upphaf í ásökunum fyrrum viðskiptafélaga þeirra," segir Friðrik og bætir við: „Við höfum orðið vitni að því hvaða afleiðingar málið hafði fyrir viðskiptasamninga af stærðargráðu sem væntanlega á sér enga hliðstæðu í íslensku viðskiptalífi, auk allra annarra afleiðinga málsins fyrir fjölda fólks."

Grein Friðriks má lesa í heild sinni hér.