Tókum þetta á endasprettinum

Sigurbjörn Hreiðarsson, Guðmundur Benediktsson og Helgi Sigurðsson voru allir í lykilhlutverki í fagnaðarlátunum hjá Valsmönnum en það var mikið fjör inni í búningsklefanum eftir leik.

Sigurbjörn er búinn að sýna Val mikla tryggð í gegnum árin. „Ég er heldur betur búinn að bíða eftir þessari stund lengi. Valur og FH eru með mjög jöfn lið og þetta gat lent hvorum megin sem var. Vendi-punkturinn var úrslitaleikurinn á móti FH um síðustu helgi því manni fannst um tíma eins og FH-ingar væru í bílstjórasætinu en við komum á endasprettinum.

Ég hefði aldrei skipt á þessari stundu fyrir einhvern pening einhvers staðar annars staðar. Valur er einfaldlega stærsti klúbburinn og nú er runninn upp nýr tími. Auðvitað fara öll stórveldi í öldudali við og við en það er líka styrkur stórveldis að rísa upp úr því og það gerðum við,“ sagði Sigurbjörn Hreiðarsson, fyrirliði Vals eftir leikinn.

Guðmundur Benediktsson átti frábært sumar og var líka kátur í leikslok. „Ég sé ekki eftir því að hafa tekið eitt tímabil í viðbót því þetta snýst um svona stundir. Ég er ótrúlega stoltur. Það var gríðarlega erfitt að fara inn í svona leik, það eru ekki margir í þessu liði sem hafa orðið Íslandsmeistarar og það er erfitt að stíga yfir þann þröskuld. Maður fann að það var stress í liðinu í dag og þegar við vorum bara einu marki yfir þá gat þetta verið fljótt að breytast. Við héldum þetta út og sýndum mikinn karakter,“ sagði Guðmundur Benediktsson og bætti við.

„Ég er sáttur með tímabilið, við erum með ótrúlega sterkt lið og það er yndislegt að fá að taka þátt í þessu. Ég er ekki kominn svo langt í lífinu að taka einhverja ákvörðun um framhaldið. Þetta er fimmti Íslandsmeistaratitillinn minn og þeir verða ekkert verri með árunum,“ sagði Guðmundur.

Helgi Sigurðsson missti af gullskónum en var ekkert að svekkja sig á því. „Ég kom í Val til þess að verða Íslandsmeistari en ekki til að verða markakóngur svo að það skiptir engu þótt ég hafi ekki náð í gullskóinn,“ sagði hás Helgi Sigurðsson í búningsklefa Vals-liðsins eftir leikinn.

„Við erum mjög sáttir við þetta og þetta er búið að vera frábært ár í sögu Vals og fyrir okkur strákana. Væntingarnar okkar voru alltaf að vinna þetta mót og við náðum þeim markmiðum okkar, við ætlum að njóta þessa í kvöld og ég á von á stórveislu,“ sagði Helgi Sigurðsson eftir leik.- óój