Frail: Eggert valinn í landsliðið

Steven Frail, aðstoðarknattspyrnustjóri Hearts, sagði í samtali við skoska fjölmiðla að Eggert Gunnþór Jónsson hafi verið valinn í A-landslið Íslands.

Frail lofar Eggert mikið í viðtalinu og segir að það sé gríðarlega mikill heiður fyrir Eggert að fá kallið frá íslenska landsliðsþjálfaranum, Ólafi Jóhannessyni.

Ólafur tilkynnir val sitt á blaðamannafundi á morgun.

Eggert er ekki nema nítján ára gamall en hefur verið fastamaður í byrjunarliði Hearts á leiktíðinni. Hann var til að mynda með betri leikmönnum liðsins í 4-1 sigri þess á Aberdeen um helgina.

„Mér finnst að Eggert hafi bætt sig í hverri viku og virðist vera mikill gæðaleikmaður," sagði Frail. „Vonandi heldur hann áfram á þessari braut því hann er drengur góður og frábær knattspyrnumaður."