Klara næsti ræðismaður Íslands á Kanaríeyjum

Klara Baldursdóttir, betur þekkt sem Klara á Klörubar, hefur undanfarna tvo daga verið með opna kjördeild á bar sínum á Kanaríeyjum fyrir þá sem vilja greiða atkvæði utan kjörfundar fyrir Alþingiskosningarnar 12. maí.

Aðsóknin hefur verið með hreinum ágætum en alls hafa 27 kosið á þessum tveimur dögum og Klara segir að fólk geti enn haft samband við sig ef það sjái ekki fram á að vera komið heim til Íslands fyrir kosningar.

„Þetta eru ekki nema rúmlega sextíu manns með börnum sem búa hérna fyrir vetrartímann þannig að kjörsókn hefur verið með hreinum ágætum," segir Klara þegar Fréttablaðið náði tali af henni í 28 stiga hita og glampandi sólskini á sólarparadísinni.

„Það eru fleiri sem eru búnir að láta mig vita og hafa áhuga á því kjósa," bætir hún við en margir sjómenn fara þarna um vegna íslenskra útgerða sem þarna eru og hafa þeir sýnt utankjörfundinum mikinn áhuga.

Klöru var úthlutað þessu verkefni eftir að íslenski konsúllinn í Las Palmas treysti sér ekki til þess sökum langvarandi veikinda.

„Hann hefur átt við veikindi að stríða í þó nokkurn langan tíma og fór í hjartaaðgerð fyrir skömmu," segir Klara. Utanríkisráðuneytinu barst jafnframt beiðni frá sendiráðinu í París þar sem farið var þess á leit að Klara myndi sjá um þessa atkvæðagreiðslu enda myndi það auðvelda þeim fjölda Íslendinga sem þar væru að kjósa enda þyrftu þeir þá ekki að leggja uppí langferð til Las Palmas.

i

Samkvæmt heimildum Fréttablaðsins kemur Klara sterklega til greina sem næsti ræðismaður fyrir Ísland á Kanarí. Fréttablaðið hafð samband við Pétur Ásgeirsson, skrifstofustjóri utanríkisráðuneytisins og hann staðfesti að beiðni um að Klara Baldursdóttir yrði gerð að ræðismanni Íslendinga lægi fyrir hjá spænskum stjórnvöldum. Og átti hann ekki von á öðru en að sú beiðni myndi renna ljúflega í gegn.

Sólþyrstu Íslendingarnir þurfa ekki að kvíða því að þeir fái ekki fyrstu tölur eins og aðrir Íslendingar því að sjálfsögðu býður Klara uppá kosningavöku 12. maí eins og áður. „Þetta er reyndar af sem áður var eftir að netið kom til sögunnar. Hérna áður fyrr var bara notast við símann, hringt heim og fólk hringdi aftur út til okkar og leyfði okkur að fylgjast með."