Keflvíkingar leika í dag síðari leik sinn gegn danska liðinu Midtjylland

Keflvíkingar leika í dag síðari leik sinn gegn danska liðinu Midtjylland. Búist er við 10 þúsund áhorfendum á leikinn sem fram fer í Danmörku.

Keflvíkingar unnu fyrri leik liðanna sem fram fór fyrir hálfum mánuði í Keflavík. Danirnir náðu þá tveggja marka forystu en Keflvíkingar skoruðu þrjú mörk og unnu mikilvægan 3-2 sigur. Danska liðið er mun sterkara á pappírunum en Keflvíkingar hafa leikformið í forskot eins og sást í Keflavík fyrir hálfum mánuði. Danirnir voru þá sterkari framan af en Keflvíkingar unnu sig betur inn í leikinn þegar líða tók á.

Keppni í dönsku úrvalsdeildinni er nýhafin, Midtjylland hefur aðeins leikið tvo leiki og á mánudaginn vann liðið óvæntan stórsigur á stórliði Bröndby, 5-0 fyrir framan 10 þúsund áhorfendur á heimavelli sínum, SAS Arena.

Ómar Jóhannsson fór ekki með Keflvíkingum til Danmerkur þar sem hann og unnusta hans eiga von á barni og því mun Bjarki Freyr Guðmundsson standa á milli stanganna í kvöld. Leikurinn hefst klukkan fimm í dag að íslenskum tíma.