Fékk ekki að kveðja eiginmann sinn eftir að honum var vísað úr landi

Eiginkona rússnesks manns sem búsettur hefur verið hér á landi undanfarin tvö ár óttast um afdrif hans eftir að hann var rekinn úr landi í gær. Maðurinn, sem er frá Tjetjeníu, var sendur til baka til Rússlands og óttast kona hans að þar verði hann settur í fangelsi vegna uppruna síns. Lögreglan meinaði henni að kveðja hann á Leifsstöð í gær.

„Ég vildi kveðja hann í gær en þeir sögðu mér að það væri ekki hægt," sagði Julia Zacharova í samtali við Vísi. Julia er eiginkona Ruslan Bogaeira sem vísað var úr landi í gær.

Að sögn Juliu fékk hún engar upplýsingar um það hvers vegna Ruslan var vísað úr landi. Hann hefur verið búsettur hér á landi í tvö ár og var meðal annars kominn með kennitölu og vinnu. Í gær var honum hins vegar vísað úr landi og hann sendur til Rússlands.

Samkvæmt upplýsingum frá ríkislögreglustjóra var manninum vísað úr landi að beiðni Útlendingastofnunar. Stofnunin kvað upp úrskurð um brottvísun í desember árið 2005. Ruslan hafi hins vegar fengið bráðarbirgðadvalarleyfi til 13. október næstkomandi af því gefnu að ekki komi til brottvísunar fyrir þann tíma. Ekki lágu fyrir upplýsingar afhverju manninum var vísað úr landi.

Julia segir Ruslan hafa óskað eftir því að vera fluttur til einhvers annars lands en Rússlands þar sem hann óttaðist að þar muni hann verða settur í fangelsi vegna uppruna síns. „Hann spurði hvort þeir gætu sent hann eitthvert annað en til Rússlands. Hann var hræddur um að verða settur í fangelsi vegna þess að hann er Tjetjeni," sagði Julia.

Julia segist vera mjög áhyggjufull og óttast að rússnesk yfirvöld hafi nú þegar sett hann í fangelsi. Hún hefur ekkert heyrt í manninum sínum frá því hann fór af landi brott í gær. „Ég bíð bara við símann eftir að hann hringi," sagði Julia.