Aðalfundur SÁÁ kaus nýja stjórn

Aðalfundur SÁÁ var haldinn fyrr í kvöld. Þórarinn Tyrfingsson, stjórnarformaður samtakanna segir fundinn hafa verið góðan og að margt góðra manna hafi komið inn í nýkjörna stjórn. Þórarinn var endurkjörinn formaður stjórnar en hann gegnir einnig stöðu yfirlæknis þeirra sjúkrastofnana sem samtökin reka. Pétur Blöndal hefur gert athugasemdir við þessa stöðu mála og hann segist hissa á því að breytingar hafi ekki verið gerðar.

Þórarinn segir fundinn hafa verið góðan. „Það var kosið í 48 manna stjórn samtakanna og þar er valinn maður í hverju rúmi." Hann segir nokkra nýliða hafa bæst í hópinn og nefnir þar Margréti Frímannsdóttur, Agnesi Bragadóttur og bræðurna Ásbjörn og Þorlák Morthens eða Bubba og Tolla.

Þórarinn segir ekki hafa komið til álita að breyta því fyrirkomulagi að hann gegndi mörgum stöðum innan fyrirtækisins enda sé sú staða fullkomlega eðlileg. „Ég er kjörinn sem stjórnarformaður á hverju ári. Þá eru störf mín lögð fyrir þessa 48 manna stjórn og ég fæ fullt umboð til að framfylgja minni stefnu næsta árið." Hann segir sjónarmið Péturs Blöndals vera þröngsýn, Pétur sé vanari hlutafélögum en að hlutirnir horfi öðruvísi við í samtökum á borð við SÁÁ. Þórarinn er formður stjórnar samtakanna og þá einnig framkvæmdastjóri auk þess sem hann er yfirlæknir þeirra sjúkrastofnana sem samtökin reka. Þórarinn bendir á að stjórnarformennskan sé ólaunað starf.

Pétur Blöndal, alþingismaður segist vera hissa á því að samtökin skuli ekki hafa breytt þessari stöðu á aðalfundinum. „Ég er dálítið hissa á þessu, að þeir hafi ekki getað fundið einhvern annan til að sitja í stjórninni," segir hann. Hann segir að um stílbrot í skipuriti sé að ræða þegar sami maður gegnir stöðu yfirlæknis en sé um leið formaður stjórnar. Hann bendir á að SÁÁ fái hluta af sínum tekjum frá ríkinu og því ættu menn að gera um það kröfu að skipuritið sé hreint. „Það þarf að vera á hreinu hver ber ábyrgðina og hver segir hverjum fyrir verkum hjá svona samtökum eins og í öðrum félögum og stofnunum," segir hann og bætir því við að eftirlitsgeta stjórnarinnar minnki mikið þegar starfsmaður sé í stjórninni hvað þá stjórnarformaður.

Pétur segist alls ekki vera að setja út á persónu Þórarins sem slíka, hann sé einungis að benda á að stjórn samtaka á borð við SÁÁ eigi að sinna ákveðinni eftirlitsskyldu og sé ekki einungis upp á punt.