Styrkur til RÚV en þó ekki

Umræðan

Ríkisútvarpið

Þegar við Páll Magnússon tókumst á um framlag Björgólfs Guðmundssonar til RÚV í sjónvarpi í fyrrakvöld þvertók hann fyrir að þar væri um styrk að ræða. Hann sagði að það væri misskilningur og fullyrti að féð rynni beint til framleiðenda utan RÚV.

En það fer ekki á milli mála að Ríkisútvarpið og Björgólfur Guðmundsson gerðu samning um að leggja í sameiningu 200 til 300 milljónir króna til framleiðslu á íslensku, leiknu dagskrárefni. Í Morgunblaðinu á laugardaginn segir: „Efnið verður framleitt af einkafyrirtækjum, en verkefnaval verður í höndum dagskrárstjóra Ríkissjónvarpsins."

Á „visir.is" var haft eftir Þórhalli Gunnarssyni, dagskrárstjóra Sjónvarps, í gær að samningurinn við Björgólf væri fyrst og fremst stuðningur við framleiðendur leikins, innlends dagskrárefnis og ljóst að fjölmargir framleiðendur myndu njóta góðs af því, m.a. Saga film, sem væri í eigu 365-miðla. Hins vegar hafði Morgunblaðið eftir dagskrárstjóranum: „Það er mjög skýrt í þessum samningi að ég vel verkefnin og þeir leggja til fjármagn ásamt okkur."

Þarna virðast þeir félagar því vera á hröðu undanhaldi. Það er nefnilega erfitt að skilja þetta öðruvísi en þannig að hér sé á ferðinni styrkur til RÚV frá einstaklingi og samkvæmt nýju lögunum um Ríkisútvarpið ohf. má það ekki hafa aðrar tekjur en af nefskatti (enn eru þó tekin afnotagjöld), auglýsingum og svonefndri kostun. Ef styrkur Björgólfs er hvorki kostun né vegna auglýsinga, hvað er hann þá?

Það er ljóst að þarna verða hagsmunatengsl Björgólfs og RÚV. En Hollvinir RÚV óttast ekki að starfsmenn RÚV láti Björgólf njóta þessara fjárhagstengsla heldur að þau muni vekja grunsemdir um að þeir taki á málefnum fyrirtækja hans með silkihönskum. Slíkar grunsemdir mega aldrei falla á starfsmenn Ríkisútvarpsins.

Og hver veit hver verður næsti leikur? Allir þverneita náttúrlega að Björgólfur fái nokkur áhrif innan RÚV vegna þessa samnings en hvaða hugsun er þá á bakvið þau orð hans að „ríkið sé versti eigandi fjölmiðils"? Allir vita líka að sterk öfl innan Sjálfstæðisflokksins vilja selja RÚV. Er ekki ástæða til að almenningur fái að sjá þennan samning?

Höfundur er formaður Hollvina Ríkisútvarpsins.