Í heildina erum við með jafn gott lið

Evrópuævintýri Íslands­meistara FH er lokið í ár eftir 4-2 tap samanlagt gegn hvítrússneska liðinu BATE. Síðari leiknum í gær lyktaði með 1-1 jafntefli þar sem Tryggvi Guðmundsson kom FH yfir úr víti í fyrri hálfleik sem hann fékk sjálfur, en BATE jafnaði metin á lokamínútunni þegar FH freistaði þess að sækja annað mark.

Auðunn Helgason fékk rautt spjald í fyrri hálfleik ásamt sóknar­manni BATE en hann var ekki sátt­ur við þann dóm. „Við byrjuðum vel, fórum framarlega og press­uðum á þá. Við gerðum þetta mjög vel, þetta leit vel út og við komumst yfir. Svo er ég rekinn út af með annað gula spjaldið og þeirra maður fékk beint rautt fyrir olnbogaskot í mig. Dómarinn var tæpur á tímum og fyrra spjaldið mitt var fyrir litlar sakir. Við vorum sanngjarnt yfir í hálfleik og síðari hálfleikurinn var líka góður," sagði Auðunn við Fréttablaðið í gær.

„Við spiluðum miklu betur en heima. Við töpuðum þessu í Kaplakrika, það var ekki ásættan­legt að tapa 3-1 þar. Við vorum ekki klárir þá, annað en í dag, og hefðum við betri úrslit að heiman hefðu möguleikar okkar á því að komast áfram verið töluverðir. Í heildina er þetta lið bara mjög svipað og við," sagði Auðunn.