Lánshæfismat Alcoa lækkað

Jón Aðalsteinn Bergsveinsson

skrifar

Alþjóðlega matsfyrirtækið Standard & Poor‘s lækkaði lánshæfismat bandaríska álrisans Alcoa á föstudag í síðustu viku úr A- í BBB+. Lækkunin kemur í kjölfar ákvörðunar stjórnar félagsins að hækka arðgreiðslur til hluthafa um 13 prósent og kaupa allt að 10 prósent af eigin bréfum. Horfur eru stöðugar að mati Standard & Poor‘s. Alcoa gaf út skuldabréf fyrir tvo milljarða Bandaríkjadala á mánudag eftir að lánadrottnar félagsins lýstu yfir áhyggjum af stöðu mála vegna lánshæfismatsins.

Í matinu koma fram efasemdir um að Alcoa geti lækkað skuldir sínar á sama tíma og félagið auki útgjöld með kaupum eigin bréfa, í ljósi þess að heimsmarkaðsverð á áli fer lækkandi. Standard & Poor‘s bendir ennfremur á að ákveðið hafi verið að lækka matið eftir að álrisinn sá sér ekki annað fært en að selja eignir til að mæta auknum kostnaði.

„Í ljósi aukinna útgjalda vegna kaupa á eigin bréfum og lækkandi álverðs verður að teljast ólíklegt að fyrirtækinu [Alcoa] takist að lækka skuldir sínar innan ásættanlegs tíma,“ segir í mati Standard & Poor‘s.

Fréttastofa Reuters hefur eftir Chris Snow, greinanda hjá bandaríska matsfyrirtækinu CreditSight, á mánudag að ákvörðun Alcoa um kaup á eigin bréfum sé einungis til þess fallin að milda hluthafa félagsins á kostnað lánadrottna. Hann bendir á að gengi hlutabréfa margra stórfyrirtækja í Bandaríkjunum hafi verið í kyrrstöðu um árabil og hafi hluthafar þrýst á stjórnendur fyrirtækjanna að þeir grípi til einhverra ráða til að þoka genginu upp á við.

Lánadrottnum líki slíkt eðlilega illa þar sem kaupin minnki líkurnar á að félagið nái að grynnka á skuldum sínum auk þess sem það auki líkurnar á móti á lægra lánshæfismati, að sögn Snows. Hann bætir við að skuldabréfaútgáfan sé til þess fallin að fjármagna endurkaup Alcoa á eigin bréfum auk þess sem vonast er til að hægt verði að róa lánadrottna félagsins með útgáfunni. Mælir hann með því að hluthafar haldi í bréf sín í félaginu.

Alcoa skilaði jafnvirði 160 milljarða króna hagnaði á síðasta ári sem er methagnaður í 118 ára sögu félagsins. Framleiðsla fyrirtækisins nam rúmum 15 milljón tonnum á tímabilinu en það er 3,6 prósenta aukning á milli ára. Álverð fór í hæstu hæðir um mitt síðasta ár en hefur farið lækkandi síðan og bendir fátt til að það fari í methæðir á nýjan leik á næstunni.