Hlynur með hauskúpubindi á Alþingi

„Ég myndi nú ekki taka svo djúpt á árinni að segja ég væri að innleiða nýja tískustrauma á Alþingi,“ segir Hlynur Hallsson, varaþingmaður Vinstri-grænna. Hlynur bindur bagga sína ekki sömu hnútum og flestir á þingi hvað klæðaburð snertir og þekkt er þegar hann mætti bindislaus í ræðustól um árið og fékk bágt fyrir.

Hann situr nú á þingi í fjarveru Þuríðar Backman og gætti sín á að gera ekki sömu mistök tvisvar heldur skartaði í gær hauskúpuskreyttu Dead-bindi skreyttu hauskúpum og jakka með textabroti úr Ferðalokum Jónasar Hallgrímssonar. Jón Sæmundur Auðarson hannar báðar flíkurnar.

„Ég sættist á að ganga með bindi á sínum tíma í þeirri góðu trú að þessi mál yrðu færð til nútímahorfs en Sólveig Pétursdóttir er hins vegar föst á því að karlar skuli vera með hálstau. Þetta er ekki stórmál í mínum huga, mér finnst bindi bara óþægileg og ljót en til þess að forðast frekari vesen ákvað ég að setja upp slifsi,“ segir Hlynur og bætir við að Jón Sæmundur hafi haft samband við sig og boðið sér bindi þegar málið kom upp á sínum tíma.

Aðrir þingmenn hafa ekki gert athugasemd við bindið að sögn Hlyns en margir eru áhugasamir um jakkann. „Það er mikið rýnt í textann en það kemur mér á óvart hversu margir vita ekki að þetta er eftir Jónas,“ segir hann og bætir við sér þyki óvíða jafn viðeigandi að klæðast jakka með kvæði eftir þjóðskáldið en einmitt á Alþingi. „Sérstaklega eru ferðalok viðeigandi því þetta er líklega í síðasta sinn sem ég sest á þing í bili.“

Margir hafa spurt Hlyn hvar hann fékk jakkann en hann segir þó suma þingmenn bera kennsl á handbragð Jóns Sæmundar. Ég held að Kolbrún Halldórsdóttir sé að minnsta kosti á leiðinni í Libourious að fá sér eitthvað svipað.“