Harry prins til Íraks

Harry Bretaprins verður sendur á vígvöllinn í Írak innan tíðar samkvæmt fréttum breskra dagblaða í gær. Greint er frá því að hann verði sendur í sérstaka þjálfun í vikunni þar sem hermönnum er kennt að mæta skyndiárásum á vígvelli.

Námskeiðið stendur í tvo daga og er lokaáfanginn í því að gera menn klára fyrir stríð. Harry er sagður spenntur fyrir því að fara til Íraks en hluti af námskeiðinu fer í að kenna honum arabísku.

„Þessi þjálfun er bara fyrir hermenn sem ákveðið hefur verið að senda til Íraks. Þeir eyða ekki tíma og peningum í aðra,“ sagði heimildarmaður News of the World innan breska hersins.

Hermálayfirvöld hafa ekki staðfest að Harry prins sé á leið til Íraks. Þar á bæ er því haldið fram að ekki hafi verið tekin ákvörðun um að herfylki hans verði sent þangað og fari svo sé ekki öruggt að allir hermenn innan þess fari með.