Ætlar að raða inn mörkum

Úkraínski sóknarmaðurinn Andriy Shevchenko hefur lofað stuðningsmönnum Chelsea því að hann fari að raða inn mörkum. Þessi 29 ára leikmaður var keyptur til félagsins fyrir metfé í maí en hann er enn ekki byrjaður að sýna markaskorunarhæfileika sína á Englandi og hefur aðeins skorað eitt mark í fimm leikjum.

"Það tekur sinn tíma að aðlagast en mér finnst það gerast hratt hjá mér. Ég mun bráðlega láta að mér kveða af alvöru. Mér hefur liðið vel hjá félaginu og bráðum fá stuðningsmenn sýningu," sagði Shevchenko sem skoraði meir en 150 mörk á sjö ára tímabili sínu hjá AC Milan á Ítalíu.