Byrgið ætlar í meiðyrðamál

Forsvarsmenn meðferðarheimilisins Byrgisins ætla að höfða meiðyrðamál fyrir dómstólum gegn Stöð 2 vegna umfjöllunar sjónvarpsþáttarins Kompás í gærkvöldi um Guðmund Jónsson, forstöðumann heimilisins. Hilmar Baldursson, héraðsdómslögmaður, sagði í samtali við fréttastofuna í dag, að hann myndi væntanlega á morgun leggja fram kæru á stöðina fyrir hönd stjórnar Byrgisins.

Ólafur Ólafsson, fyrrverandi landlæknir og læknir meðferðarheimilisins Byrgisins, segir þær ásakanir sem komu fram á hendur forstöðumanni þess, Guðmundi Jónssyni í þættinum Kompás í gær, vera reiðarslag. En umfjöllun þáttarins um Byrgið er ekki næg ástæða til sérstakrar rannsóknar segir Ólafur Helgi Kjartansson, sýslumaðurinn á Selfossi. Hann segir engar kvartanir eða kærur hafa borist og því sé ekki sjáanlegur grundvöllur til rannsóknar enda vísi Guðmundur í Byrginu öllum ásökunum á bug. Það kom fram í þættinum, Guðmundur Jónsson hefði samkvæmt fjölda vitna ítrekað tælt skjólstæðinga sína til kynlífsathafna. Byrgið hefur fengið röskar 200 milljónir króna í opinbera styrki síðustu ár og verið með þjónustusamning við Fangelsismálastofnun um meðferð fanga. Valtýr Sigurðsson fangelsismálastjóri segir að sannleiksgildi ásakananna í gærkvöldi verði kannað og í kjölfarið tekin ákvörðun um framhald samningsins. Ríkið keypti húsnæðið að Efri- Brú undir starfsemina á 118 milljónir. Eftir því sem næst verður komist er ekkert opinbert eftirlit með faglegri starfsemi Byrgisins.

Guðmundur Týr Þórarinsson, forstöðumaður Götusmiðjunnar (þekktur sem Mummi í Mótorsmiðjunni) taldi þörf á að senda frá sér yfirlýsingu í dag til að fyrirbyggja, að honumn verði ruglað saman við forstöðumann Byrgisins, Guðmund Jónsson.

Yfirslýsingin er eftirfarandi: "Í kjölfar umfjöllunar fréttaskýringaþáttarins Kompáss í gærkvöldi um ásakanir um meinta hegðun forstöðumanns Byrgisins, Guðmundar Jónssonar, telur Götusmiðjan brýna nauðsyn að leiðrétta þann misskilning að ekki er um Götusmiðjuna að ræða né heldur forstöðumann hennar, Guðmund Tý Þórarinsson.

Í gegnum tíðina virðist þessum tveim fyrirtækjum, Götusmiðjunni og Byrginu, hafa verið ruglað saman. Tekið skal fram að engin tengsl eru á milli fyrirtækjanna né forstöðumanna þeirra, Guðmundar Jónssonar og Guðmundar Týs Þórarinssonar. Í þessari yfirlýsingu felst engin afstaða undirritaðs um meint brot eða hegðun Guðmundar Jónssonar, forstöðumanns Byrgisins."