Lögregla með viðbúnað vegna myrkvunar

Lögreglan í Reykjavík verður með aukinn viðbúnað í kvöld þegar Reykjavíkurborg verður myrkvuð frá klukkan 22 til 22:30. Þá verður slökkt á allri götulýsingu. Myrkvunin hefur þó ekki áhrif á öryggiskerfi og umferðarljós verða áfram virk. Myrkvunin er í tilefni af setningu Alþjóðlegu kvikmyndahátíðarinnar í Reykjavík.

Lögreglan hvetur fólk til að vera sem minnst á ferðinni á þessum hálftíma. Bein útsending verður frá myrkvuninni á Vísi.is en hún hefst fyrir klukkan 22:00 og verðu hægt að fylgjast með þegar ljósin verða slökkt og þar til þau verða kveikt aftur hálftíma síðar.