Landhelgisgæslan stendur veiðiþjófa að verki

Eftirlitsflugvélin Syn var í flugi yfir úthafskarfamiðin á Reykjaneshrygg í dag þegar áhöfnin stóð flutningaskip að því að þjónusta sjóræningjaskipið Carmen. Flutningaskipið heitir Polestar og er skráð í Panama sem frystiskip.

Er Syn flaug yfir skipin voru þau stödd 480 sjómílur frá Reykjavík eða 190 sjómílur frá mörkum efnahagslögsögu Íslands þar sem yfir 50 erlend skip eru að veiðum. Þar sem Ísland er aðili að Norðaustur-Atlantshafsfiskveiðiráðinu tekur Landhelgisgæslan þátt í eftirliti með fiskveiðum á svæðinu. Greinilegt er að skipin reyna að athafna sig eins fjarri lögsögumörkum og hægt er til að verða síður staðin að verki. Annað sjóræningjaskip, Dolphin, lónaði mitt á milli úthafskarfaveiðiflotans og Polestar.

Áhöfnin á Syn tilkynnti skipstjóra Polestar að ef það þjónustaði skip sem væri að veiðum án kvóta á samningssvæði Norðaustur-Atlantshafsfiskveiðiráðsins, færi það á svartan lista ráðsins og það hefði alvarlegar afleiðingar fyrir skipið og útgerð þess. Skipstjórinn sagðist eingöngu vera að láta skipið hafa umbúðir. Á þessari stundu er ekki ljóst hvort Polestar var að taka við afla frá Carmen eins og áhöfn Synjar grunaði en samkvæmt reglunum má ekki veita sjóræningjaskipum neina þjónustu, þar með talið að útvega því umbúðir.

Skýrsla um málið verður send frá Landhelgisgæslunni til sjávarútvegsráðuneytisins sem kemur upplýsingunum á framfæri við aðalskrifstofu Norðaustur-Atlantshafsfiskveiðiráðsins í London. Flutningaskipið fer líklega á svartan lista NEAFC (Norðaustur-Atlantshafsfiskveiðiráðsins).

Meðfylgjandi myndir tók Hafsteinn Heiðarsson flugmaður á eftirlitsflugvél Landhelgisgæslunnar, Syn, en á myndunum má meðal annars sjá öflug fríholt utan á flutningaskipinu sem kemur í veg fyrir að skipin sláist saman í úthafsöldunni. Einnig má sjá á mynd nr. 4 að Carmen (minna skipið) hefur fært stjórnborðshlerann svo að hann valdi ekki skemmdum á flutningaskipinu þegar skipin liggja saman.