Ákærð fyrir að hafa orðið nýfæddum börnum sínum að bana

Réttarhöld hófust í Frankfurt í Þýskalandi í dag yfir konu sem er grunuð um að hafa orðið átta nýfæddum börnum sínum að bana. Líkamsleifar ungbarnanna fundust síðasta sumar. Málið hefur vakið mikinn óhug í Þýskalandi og er þess krafist að barnaverndarlög verði hert.

Hin fertuga Sabine H, eins og hún er kölluð, var handtekinn þegar lík níu barnanna fundust grafin í blómapotta og gömul fiskabúr víðsvegar í garði foreldra hennar en þau búa nálægt landamærunum að Pólandi. Sabine kom fyrir héraðsdóm þar sem hún þarf að svara átta manndrápsákærum og gæti átt yfir höfði sér allt að fimmtán ára fangelsi verið hún sakfelld. Hún er ekki ákærð vegna dauða elsta barnsins þar sem það mál er fyrnt.

Saksóknari segir rannsóknir á erfðaefnum hafa leitt í ljós að börnin hafi látið lífið á árunum 1988 til 1998, öll skömmu eftir fæðingu.

Oliver, eiginmaður Sabine, er sagður fyrrverandi liðsmaður austur-þýsku leyniþjónustunnar Stasi. Hann hefur ekki viljað tjá sig opinberlega um málið en hefur þó látið hafa eftir sér að hann hefði ekki orðið var við það að kona sín væri ólétt. Sabine á nú fjögur uppkomin börn og eina unga dóttur.

Verjandi Sabine segir að við málsmeðferð verði meðal annars að taka tillit til þess að hún hafi átt erfiða æsku auk þess sem hjónaband hennar hafi verið henni erfitt og maður hennar hafi ekki viljað eignast fleiri börn eftir að þrjú voru fædd.

Saksóknari segir að í upphafi hafi átt að kæra Sabine fyrir morð en það hafi dómstólar ekki talið rétt og því hafi ákæruliðum verið breytt þannig að Sabine er ákærð fyrir manndráp.

Sabine segir sjálf að hún hafi ekki skaðað börnin heldur leyft þeim að deyja eftir að hún hafði fætt þau án aðstoðar. Hún segist aðeins muna eftir tveimur fæðingum en í hin skiptin hafi hún verið ölvuð.

Þýskur almenningur er harmi sleginn vegna málsins en spyr sig um leið hvernig fjölskylda konunar hafi ekki veitt því athygli að hún var þunguð í þessi níu skipti.