Kosið í Ísrael í dag

Þingkosningar fara fram í Ísrael í dag. Valkostir eru afar skýrir að þessu sinni en á meðan Kadimaflokkurinn og Verkamannaflokkurinn vilja rýma minni landnemabyggðir, segja forsvarsmenn Likud-bandalagsins það ekki koma til greina. Útgönguspár verða birtar þegar kjörstöðum lokar í kvöld, kl. 20 að íslenskum tíma.

Kannanir benda til að Kadima-flokkur Ehud Olmerts, starfandi forsætisráðherra landsins fái flesta þingmenn eða um 34. Þá fái Verkamannaflokkurinn um 20 þingmenn og Likud-bandalagið 14. Alls eru 120 þingmenn á ísraelska þinginu. Kannanir benda þó einnig til að kjörsókn verði lítil. Talið er að um 40% kjósenda, ætli ekki að mæta á kjörstað. Það er talið bitna helst á stóru flokkunum Kadima og Verkamannaflokknum en alls er 31 listi í framboði.

Valkostir kjósenda þykja óvenju skýrir að þessu sinni. Olmert vill að Ísraelsstjórn ákveði á kjörtímabilinu einhliða endanleg landamæri Ísraelsríkis á Vesturbakkanum og það það verði búið árið 2010. Hann vill rýma minni landtökubyggðir gyðinga en skilja svo að Ísraelsmenn og Palestínumenn. Talið er víst að Olmert fái stuðning Verkamannaflokksins við áætlun sína og að flokkarnir myndi samsteypustjórn með einhverjum smáflokkana. Um 60.000 Ísraelar á Vesturbakkanum flytja búferlum ef áætlun Olmerts verður hrint í framkvæmd. Likud-bandalagið, undir forystu Benjamins Nethanjahus, fyrrverandi forsætisráðherra Ísraels, vill hins vegar alls ekki gefa neitt eftir á Vesturbakkanum.

Nokkur átök hafa brotist út á meðal Ísraela og herskárra palestínumanna á Vesturbakkanum í dag. Gríðarleg öryggisgæsla er vegna kosninganna en yfir 22 þúsund lögreglumenn gæta öryggis við verslunarhús og aðra opinbera staði í Jerúsalem vegna hættunnar á hryðjuverkum.