Anthony tryggði Denver sigur á Indiana

Carmelo Anthony skoraði enn eina sigurkörfuna fyrir lið sitt Denver Nuggets í nótt þegar það bar sigurorð af Indiana Pacers á útivelli 101-99. Þetta var annar sigur Denver í röð í Indiana eftir að hafa ekki unnið þar í 9 ár. Anthony skoraði 31 stig fyrir Denver, en Peja Stojakovic skoraði 22 stig fyrir Indiana.

Önnur helstu úrslit næturinnar urðu þau að Detroit lagði Toronto á útivelli 105-98 og lagði grunninn að sigrinum með því að hitta úr 10 af 14 þriggja stiga skotum sínum. Chauncey Billups skoraði 26 stig og gaf 10 stoðsendingar hjá Detroit.

Dallas lagði Houston 95-81. Dirk Nowitzki skoraði 30 stig og hirti 11 fráköst fyrir Dallas, en Yao Ming skoraði 36 stig og hirti 12 fráksöst hjá Houston.

New York lagði Atlanta í tvíframlengdum leik 121-116, Milwaukee burstaði Chicago 104-88, Orlando lagði Utah í framlengingu 114-108, Washington lagði Charlotte 107-99, New Jersey lagði Portland 78-65, LA Lakers lagði Minnesota 92-89 og Phoenix burstaði LA Clippers 126-95.