Staða Olmerts styrkist

Staða Ehuds Olmert, starfandi forsætisráðherra Ísraels, hefur styrkst eftir árás hersins á fangelsi Palestínumanna í Jeríkó á þriðjudag þar sem Ahkmed Saadat, leiðtogi herskárrar hreyfingar Palestínumanna, var numinn á brott. Stjórnmálaskýrendur segja ástæðuna vera þá að Ísraelar elski það þegar óvinurinn er niðurlægður.

Þá réðst ísraelski herinn inn í palestínska bæinn Jenín á Vesturbakka Jórdanar í morgun og handtók þar fimm Palestínumenn. Arababandalagið hefur fordæmt árásina og segir að Bretar og Bandaríkjamenn bera ábyrgð á árásum Ísraelsmanna. Dagböð í Ísrael fagna hins vegar árásunum og hæla ísraelska forsætisráðherranum fyrir aðgerðirnar. Ísraelska dagblaðíð Yedioth Ahronoth segir meðal annars að kjósendur elski slíkar aðgerðir þar sem óvinurinn sé niðurlægður. Sjónvarpað var beint frá fyrri aðgerðinni þar sem um 120 fangar sem voru í fangelsinu var skipað að afklæðast, þeir bundnir á höndum, bundið var fyrir augu þeirra og þeir leiddir burtu á nærbuxunum meðan jarðýtur og skriðdrekar Ísrarelshers jöfuðu fangelsið við jörðu. Talsmenn Palestínumanna segja aðgerðir Ísraela, sem þeir segja hafa verið í samráði við Breta og Bandaríkjamenn, hafi dregið verulega úr friðarlíkum og hafa herskáir Palestínumenn lofað að hefna fyrir árásirnar og það með hörku. Þá ræðir Öryggisráðið í dag tillögu um að fordæma Ísrael fyrir árásirnar í Jeríkó þar sem Ahmed Saadat, leiðtogi Alþýðufylkingarinnar til frelsunar Palestínu, og nokkrir aðrir fangar voru numdir á brott. Ísraelar segja þá verða sótta til saka vegna morðs á ísraelskum ráðherra og aðra glæpi. Samkvæmt könnun sem dagblaðið Yediot Aharonot lét gera þá mun Kadima, flokkur Olmerts, hljóta 39 sæti af 120 á ísraelska þinginuí kosningunum sem fram fara 28. mars. Þetta er tveimur þingsætum fleiri en í fyrri könnun en flokkurinn virðist hafa fengið aukið fylgi vegna árásanna. Verkamannaflokkurinn mun hljóta 19 sæti á meðan Likud-flokkurinn mun hljóta 15.