Nú eru jólin

Framherjinn Robbie Fowler var kynntur til sögunnar sem nýjasti liðsmaður Liverpool á blaðamannafundi í dag, þar sem hann sagði að framvegis yrði hver dagur eins og jóladagur hjá sér eftir að hann fékk að snúa aftur á gamlar slóðir.

"Ég er sönnun þess að ef maður óskar einhvers nógu heitt, mun það á endanum verða að veruleika," sagði Fowler kátur við blaðamenn. "Ég er í sjöunda himni að vera kominn aftur til Liverpool og mér finnst ég vera eins og krakki að vakna upp á jóladagsmorgun á hverjum degi. Síminn hjá mér hefur verið rauðglóandi síðan þetta varð ljóst og ég get sagt að ég þurfti varla að lesa það sem stóð í samningnum sem lá á borðinu fyrir framan mig - ég var það viss um að þetta væri það besta fyrir mig," sagði Fowler ánægður.