Leitar tilboða í Straumsbréf

Stjórn Lífeyrissjóðs verzlunarmanna (LV) ákvað að leita eftir tilboðum í fimm prósenta hlut sinn í Straumi-Burðarási. Miðað við gengi Straums í gær er virði hlutarins tæpir tíu milljarðar króna.

Að sögn Þorgeirs Eyjólfssonar, forstjóra LV, hefur verið sent út bréf til þeirra aðila sem talið er að kunni að hafa áhuga á bréfunum. Frestur til að skila inn tilboðum rennur út að hádegi á mánudaginn. Stjórnendur sjóðsins áskilja sér rétt til að taka hvaða tilboði sem er eða hafna öllum.

"Við höfum átt þennan hlut til margra ára og teljum tímabært að leysa hann inn."