Blæs á gagnrýni Pardew

Arsene Wenger, stjóri Arsenal, gefur lítið út á gagnrýni kollega síns Alan Pardew hjá West Ham sem fetti fingri út í það að fyrirsagnir enskra blaða töluðu um að Arsenal væri fulltrúi Englands í Meistaradeildinni. Pardew átti þar við þá staðreynd að fleiri enskir leikmenn hefðu verið í spænska liðinu Real Madrid en í Arsenal í viðureign liðanna í vikunni.

"Þetta er spurning um gildi en ekki vegabréf. Ég ber að stórum hluta ábyrgð á hefðum Arsenal, en það er aftur á móti enska knattspyrnusambandið sem á að sjá til þess að enska hefðin haldist - og þá með enska landsliðinu. Ég skil ekki svona athugasemdir, því ég hélt að við værum að reyna að útrýma fordómum í fótboltanum," sagði Arsene Wenger.