Því fleiri leikir, því betra

Frank Lampard, leikmaður Chelsea, segist fagna því að spila sem allra flesta leiki og gefur lítið út á þær skoðanir manna að leikjaálagið á Englandi muni koma niður á landsliðinu á HM í sumar.

Rafa Benitez, stjóri Liverpool er einn þeirra sem hefur farið fram á að leikmönnum sínum verði gefin hvíld í einstaka leikjum til að ekki sé of mikið álag á þeim, en Lampard er á öðru máli.

"Því fleiri leiki sem maður spilar, því betur gengur liði manns og það heldur manni gangandi. Mér er alveg sama þó ég spili um hverja helgi og í miðri viku líka og þessvegna hef ég ekki áhyggjur af að við verðum orðnir eitthvað slappir á HM í sumar," sagði Lampard, sem hefur verið ótrúlega stöðugur og heppinn með meiðsli á síðustu árum.