CCP verður útskrifað í janúar

CCP verður útskrifað úr samtökum sprotafyrirtækja (SSP) eftir að velta félagsins fór yfir einn milljarð króna á þessu ári. Hilmar Veigar Pétursson, framkvæmdastjóri CCP, segir að sprotafyrirtæki sé skilgreint sem fyrirtæki er hafi veltu undir einum milljarði króna og býst við útskriftarathöfn í janúar.

„Við viljum hvetja önnur íslensk sprotafyrirtæki til þess að fylgja í okkar fótspor. Ef við getum þetta þá hljóta fleiri að geta það líka.“

Rekstur félagsins hefur gengið vel á þessu ári. Velta CCP nam um 1,3 milljörðum króna á fyrstu níu mánuðum ársins og var hagnaður á sama tíma um 370 milljónir króna. CCP hefur vaxið gríðarlega á þessu ári en velta alls síðasta árs var 700 milljónir króna. „Leikjabransinn er svona, þú tekur inn í kassann á ákveðnum tímabilum og ferð svo út í endurfjárfestingar.“

CCP kynnti nýja útgáfu af netleiknum EVE-online þann 28. nóvember og hafa 300-400 nýir þátttakendur bæst við á hverjum degi.

Nýtt heimsmet var slegið á sunnudaginn þegar 33 þúsund manns voru að spila á sama tíma. „Fyrra metið var 30 þúsund manns þannig að þetta er töluverð bæting. Það fylgir þessum nýju útgáfum að menn verða spenntir og fara að spila á fullu.“ Hilmar bendir á að enginn annar leikur leyfir svona mikla þátttöku á sama tíma á sama miðlara (server).

„Samkeppnisaðilar okkar leyfa vanalega þrjú til fimm þúsund manns að spila samtímis á sama server.“

Erlendir fjárfestar hafa sýnt félaginu áhuga og hefur General Catalyst Partners, bandarískur fjárfestingasjóður, eignast fimmtán prósenta hlut í CCP.