Tíu ára áætlun VÍS lauk á tæpum tveimur árum

Þegar Finnur Ingólfsson kom til starfa hjá VÍS seint árið 2002 var félagið metið á tólf milljarða króna. Virði VÍS eignarhaldsfélags í dag er tæpir 66 milljarðar króna eftir að greint var frá því að Exista hefði eignast félagið að fullu.

Við settum okkur tíu ára markmið þegar við skipulögðum fyrirtækið árið 2003. Á um það bil tveimur árum höfðum við náð flestum markmiðunum. Vöxturinn og árangurinn fór langt fram úr því sem björtustu vonir stóðu til, segir Finnur. Hann lætur nú af störfum sem forstjóri VÍS eignarhaldsfélags en verður starfandi stjórnarformaður Vátryggingafélags Íslands. Hann er bæði sáttur við eigendaskiptin og eigin vistaskipti en Ásgeir Baldursson tekur við starfi framkvæmdastjóra VÍS.

Þegar flestar stærðir eru bornar saman má segja að félagið hafi sexfaldast. Heildareignir félagsins hafa vaxið úr tuttugu milljörðum króna í 110 milljarða og eigið fé farið úr 4,9 milljörðum í þrjátíu. Markaðshlutdeild VÍS hefur einnig vaxið jafnt og þétt á þessum tæpu fjórum árum, farið úr 32 prósentum í tæp 40 prósent.

Finnur lýsir betur þeim breytingum sem urðu eftir að hann koma til starfa. Við skipulögðum fyrirtækið út frá því að það væri tryggingafélag en víkkuðum út hlutverk þess þannig að það væri jafnframt öryggis- og fjármálaþjónustufyrirtæki. Frá þeim tíma hefur VÍS bætt við sig hlutabréfum í Öryggismiðstöð Íslands, keypt Lýsingu og tryggingafélögin Vörð og Íslandstryggingu. Jafnframt er VÍS brautryðjandi í útrás íslenskra tryggingafélaga með fjárfestingum í Englandi og Noregi. Telur Finnur að vöxtur tryggingafélaganna liggi á erlendum miðum á næstu árum. Samkeppnin hér heima er mikil og tryggingamarkaðurinn vex lítið. Þú verður í vextinum að leita út fyrir landsteinanna. Við höfum skilgreint okkar markað sem Norðurlöndin og Bretland.

En til þess að ná árangri þurfa ýmsir þættir að vera til staðar að mati Finns. Fyrirtækið þarf að vera fjárhagslega öflugt til þess að geta tekið áhættu sem snýr að kraftmiklum vexti. Finnur nefnir einnig að fyrirtæki verði að eiga trausta og ánægða viðskiptavini og síðast en ekki síst ánægt og gott starfsfólk. Allt þetta hefur verið til staðar hjá okkur.

Finnur er spurður um kaup VÍS á hlutabréfum ríkisins í Búnaðarbankanum í ársbyrjun 2003 en þessi hlutur hefur margfaldast að virði. Það hefur verið afskaplega vel spilað úr þeirri fjárfestingu og þar skipti höfuðmáli sameining Búnaðarbankans á sínum tíma við Kaupþing. Hann bætir við að töluverð áhætta hafi legið í þessum kaupum fyrir þá aðila sem komu að kaupunum.