Gunnþór verður for­maður SFS í stað Guðmundar

Í fréttatilkynningu frá SFS segir að á fundi stjórnar samtakanna, sem haldinn var í dag, hafi breytingarnar verið samþykktar. 

Þá var samþykkt að Ægir Páll Friðbertsson, ritari samtakanna, forstjóri Iceland Seafood ehf., taki við varaformennsku í samtökunum og að Anna Guðmundsdóttir, fjármálastjóri Gjögurs hf., taki við embætti ritara samtakanna. 

Einnig var samþykkt að Daði Hjálmarsson, framkvæmdastjóri KG fiskverkunar hf., taki sæti í framkvæmdaráði samtakanna. Stjórn samþykkti einnig kjör Friðriks Friðrikssonar, framkvæmdastjóra mannauðssviðs Brims hf., í stjórn samtakanna.

„Stjórn Samtaka fyrirtækja í sjávarútvegi þakkar Guðmundi Kristjánssyni, fráfarandi formanni, fyrir samstarfið í forystusveit samtakanna. Framlag Guðmundar til sjávarútvegs og samtakanna í gegnum tíðina er mikið. Stjórnin harmar að leiðir skilji á þessum tímapunkti en Guðmundur verður áfram þátttakandi í starfi samtakanna sem öflugur félagsmaður.

Samtakamáttur og samstaða um starfsskilyrði íslensks sjávarútvegs er og verður leiðin fram á við til aukinnar verðmætasköpunar. Stjórn samtakanna óskar Guðmundi velfarnaðar fram veginn við áframhaldandi uppbyggingu sjávarútvegs á Íslandi,“ segir í tilkynningunni.