Selur ísbílinn eftir þrjá­tíu ár í bransanum

Ásgeir keypti fyrirtækið árið 2006 eftir að hafa unnið hjá fyrirtækinu frá upphafi þess. Hann kveður því ísbílinn eftir rúmlega þrjátíu ár.

„Það eru bara breytingar á persónulegum högum,“ svarar Ásgeir spurður hvers vegna hann selji nú bílinn. 

Hann útskýrir enn fremur að fyrirtækið hafi verið rekið sem fjölskyldufyrirtæki síðustu ár, en nú séu þau konan að skilja. „Þetta gengur ekki almennilega að vera reka þetta einn,“ segir Ásgeir.

Fyrirtækið byrjaði með einum bíl um hvítasunnuna árið 1994 en gerir í dag út fjórtán ísbíla.

Ásgeir segir að reksturinn hafi gengið vel öll þau ár sem bíllinn hefur verið rekinn, í plús fram til ársins 2023 en þá hafi leiðrétting á fyrri skuldum sett strik í reikninginn. 

Ársreikningur fyrir 2024 liggur ekki fyrir en í lok árs 2023 nam eigið fé félagsins um 9,9 milljónum króna.

„Þetta er alveg klikkað tækifæri í sjálfu sér fyrir einhvern sem á smá pening og vill taka til hendinni,“ segir Ásgeir.

En nú tekur annað við hjá Ásgeiri. Hann hefur síðustu ár meðal annars iðkað lomilomi-nudd, sem er á rætur að rekja til Pólýnesíu. „Það er svona áhugamál,“ segir hann. „Ég dúlla mér örugglega fram í aldur með það.“