Sprengju kastað á símamarkaðinn

Fjöldi fyrirtækja ætlar að bjóða nýja tegund símaþjónustu, svokallaða netsíma, eftir að Póst- og fjarskiptastofnun heimilaði í gær að símanúmer yrðu flutt úr hefðbundinni símaþjónustu yfir í nýja kerfið sem byggir á gagnasendingum yfir internetið (VoIP).

Stofnunin hefur einnig ákveðið að úthluta sérstökum símanúmerum fyrir "flökkuþjónustu" sem ekki er bundin við ákveðna staðsetningu. Þau númer byrja á 49 og auðkennd með því.

Stóru símafyrirtækin ætla bæði að bjóða upp á netsíma og Skýrr hefur hafið undirbúning að netsímaþjónustu fyrir almenning. Eins ætla Hive og fyrirtækið NetAFX að bjóða þjónustuna, en bæði bjóða nú þegar upp á símtöl yfir internetið. Svo hugsa internetþjónustur sér sumar til hreyfings.

 "Þetta er sprengja á Símamarkaðnum," segir Jón Elíasson, framkvæmdastjóri NetAFX, sem ætlar að bjóða flökkunúmer til að byrja með, en segist þó hafa alla burði til að bjóða fastnúmer líka. Þeim fylgja þó meiri kvaðir, svo sem um talhólf, númerabirtingu, hlerunargetu yfirvalda, rekstraröryggi og að hægt sé að hringja í neyðarnúmer.

Jón segir ljóst að símakostnaður lækki mikið með nýju þjónustunni og bendir á að þróunin hafi verið sú erlendis. "Hjá Telio í Noregi er fólki boðið fyrir 1.500 krónur íslenskar á mánuði að tala frítt innanlands og upp að 150 mínútum til útlanda," segir hann.

Guðmundur Kr. Unnsteinsson, framkvæmdastjóri Hringiðunnar, segir alla símstöðvar og símatækni almennt að færast yfir á IP staðla. Hann segir fyrirtækið vera að skoða af fullri alvöru að bjóða símaþjónustu og hafi þegar hafið umsóknarferli vegna þess. "En búnaðurinn er dýr og dýrt að gera þetta almennilega."

Talsmenn Símans og Og Vodafone segja netsímann spennandi nýjung sem fylgi mörg ný tækifæri. Fyrirtækin eru þó ekki tilbúinn að segja til um hvenær nýjar áskriftarleiðir verði tilbúnar hjá þeim, málið sé í skoðun.

Hreinn Jakobsson, forstjóri Skýrr, bendir á að VoIP tækni hafi verið í umræðunni síðustu átta árin og því kunni að vera óráð að fara sér of hratt. Hann segir fyrirtækið hins vegar stefna á að bjóða almenningi símaþjónustu og að unnið sé að undirbúningi þess. "Við sjáum í þessu heilmikil tækifæri og tæknin er á fljúgandi ferð," segir hann.