15 þúsund manns á kvikmyndahátíð

Alls sóttu 15.500 manns kvikmyndahátíðina Októberbíó­fest sem hófst 26. október. Hátíðin fékk mjög góðar viðtökur hjá áhorfendum, erlendum gestum og gagnrýnendum.

Franska heimildarmyndin Ferðalag keistaramörgæsanna, eða La Marche De L"empereur, var valin besta mynd hátíðarinnar. Þúsundir manna gáfu myndunum einkunn á heimasíðu hátíðarinnar og þegar öll atkvæði voru talin báru mörgæsirnar sigur úr býtum.

Í öðru sæti lenti Kung Fu Hustle og í því þriðja varð danska myndin Drabet, sem var opnunarmynd hátíðarinnar. Ferðalag keisaramörgæsanna var jafnframt aðsóknarmesta mynd hátíðarinnar. Kemur það ekki á óvart því hún er þegar orðin aðsóknarmesta franska mynd sögunnar og önnur aðsóknarmesta heimildarmynd sögunnar á eftir Fahrenheit 9/11.

Hrylllingsmyndin Hostel var hvorki gjaldgeng í kosningu um bestu myndina né aðsóknina vegna þess að hún var sýnd aðeins tvisvar sinnum. Hinir erlendu gestir hátíðarinnar voru afar hrifnir af landi og þjóð. Quentin Tarantino fullyrti að þetta væri langskemmtilegasta hátíð sem hann hefði nokkru sinni heimsótt. Vildi hann endilega starfa meira með Iceland Film Festival í framtíðinni.