Logar enn í norska olíuskipinu

Enn logar mikill eldur í norska olíuflutningaskipinu Fjord Champion úti fyrir suðurstönd Noregs, en eldur kom upp í skipinu seint í gærkvöldi. Samkvæmt netsíðu norska blaðsins Verdens Gang stóð til að dráttarbáturinn Haabull kæmi á vettvang um hádegisbil og drægi skipið lengra út áður en slökkvistarf gæti hafist fyrir alvöru, en dráttarbáturinn er búinn öflugum vatnsdælum sem eru þær einu sem hægt er að nota við slökkvistarfið. Óttast er að meiri háttar umhverfisslys verði ef átta hundruð tonn af olíu, sem eru í skipinu, leka í hafið og eftir því sem tíminn líður eykst hættan á að skrokkur skipsins rifni og olían leki út. 28 manns voru í áhöfn Fjord Champion og hefur öllum verið bjargað, en ellefu voru fluttir á sjúkrahús.