10-15 læknar fá áminningu árlega

Tíu til fimmtán læknar fá tiltal eða áminningu á hverju ári vegna þess að þeir ávísa of miklu af ávanabindandi lyfjum. Landlæknir segir upplýsingar úr lyfjagagnagrunninum hafa gagnast eftirliti með þessum málum vel en hann hefur einnig nýst á hinn veginn - til að eyða gróusögum um lækna sem sagðir voru of ávísanaglaðir. Þótt lyfjagagnagrunnurinn sé tæknilega ekki kominn hundrað prósent í gagnið er hann þegar farinn að gagnast heilbrigðisyfirvöldum vel til að fá yfirsýn yfir notkun lyfja, ekki bara þeirra ávanabindandi heldur allra flokka. Aðspurður hvort rætt sé við alla lækna eða farið eftir vísbendingum segir Sigurður Guðmundsson landlæknir að um hvort tveggja sé að ræða. Hann segir grunninn notaðan bæði til að sanna og afsanna „kviksögur“, ef svo megi segja, og því miður séu þær stundum staðfestar. Ef upp kemst um einhvers konar misferli er læknum fyrst veitt ádrepa eða tiltal, ef brotið er alvarlegt er veitt formleg áminning og ef ástandið lagast ekki er send tillaga til heilbrigðisráðherra um leyfissviptingu. Það gerist nokkrum sinnum á ári segir landlæknir, oftast vegna lækna en vissulega einnig vegna starfsmanna annarra heilbrigðisstétta. „Þá er það lang-, langoftast vegna þess að heilbrigðsstarfsmaðurinn er sjálfur í vandræðum vegna lyfjanotkunar,“ segir Sigurður. En sem betur fer eru svörtu sauðirnir í læknastéttinni fáir. Alvarlegar ádrepur og áminningar eru 4-5 á ári og svipaða sögu er að segja af leyfissviptingum að sögn landlæknis.