Skólp var leitt í drenlögn

Mælingar heilbrigðiseftirlits í Arnarneslæk í Garðabæ í maí sýndu saurgerla langt yfir öllum mörkum. Fyrir neðan Ljósamýri í Garðabæ mældust 17.000 saurkólígerlar í hverjum 100 millilítrum vatns og 73 þúsund saurkokkar. Til samanburðar má nefna að í Hraunholtslæk þar sem ástandið er "verst" mældust 34 saurkólígerlar og 47 saurkokkar í hverjum 100 millilítrum vatns. Guðmundur H. Einarsson, framkvæmdastjóri Heilbrigðiseftirlits Hafnarfjarðar- og Kópavogssvæðis, sagði ekki hafa verið ástæðu til að girða svæðið af. "Ef þetta væri hreint skolp þá hlypu tölurnar á milljónum, en þetta er ekki til að vaða í og við viljum meina að þarna hafi eitthvað farið úrskeiðis." Gústaf Jónsson forstöðumaður þjónustumiðstöðvar Garðabæjar taldi síðdegis í gær að ástæða mengunarinnar væri fundin og rakti hana til mistaka við tengingu skólplagnar frá íbúðarhúsi. Skólp barst í drenlögn og þaðan með regnvatni út í lækinn. "Svo liggur þetta trúlega líka í því hversu lítið vatn er í læknum og þessar tölur því fljótar að fara upp," sagði hann. "Við gerum við þetta í hvelli."