Þörf á blóðgjöfum þar sem þjóðin eldist

Þörf er á fleiri blóðgjöfum hér á landi þar sem íslenska þjóðin er að eldast. Með hækkandi meðalaldri þurfa fleiri á blóði að halda á meðan þeim fækkar hlutfallslega sem staðið geta undir blóðgjöfum. Þetta segir Sveinn Guðmundsson, yfirlæknir hjá Blóðbankanum sem ætlar ásamt Og Vodafone að standa að auglýsingaherferð þar sem fjölga á blóðgjöfum og vekja fólk til umhugsunar um þessa áskorun framtíðarinnar.

Blóðbankinn og Og Vodafone hafa undanfarin tvö ár unnið saman að því að fjölga blóðgjöfum hér á landi svo hægt sé að bregðast við alvarlegum slysum, náttúruhamförum og öðru neyðarástandi. Um níu þúsund manns, eða fimm prósent þjóðarinnar, gefa blóð reglulega en betur má ef duga skal segja forsvarsmenn Blóðbankans. Þeir munu ásamt Og Vodafone ýta úr vör auglýsingaherferð með yfirskriftinni „Hetjur óskast".

Sveinn Guðmundsson, yfirlæknir hjá Blóðbankannum, segir ekki um að ræða bráðan skort á blóði heldur sér horft til þess að viðhalda og helst stækka blóðgjafahópinn, en Blóðbankinn þarf um 70 blóðgjafa á dag til að sinna hlutverki sínu.

Sveinn segir enn fremur að íslenska þjóðin sé að verða eldri og með hækkandi meðallaldri þurfi fleiri á blóði að halda á meðan þeim fækkar hlutfallslega sem staðið geta undir blóðgjöfum. Þessi þróun hafi verið á Vesturlöndun og m.a. leitt til þess í Bandaríkjunum og Bretlandi að skortur hafi skapast á blóði og blóðhlutum.

Blóðbankinn hvetji fyrirtæki, félög, sveitarfélög og ekki síst heilbrigðisyfirvöld til að gera sér grein fyrir þessari áskorun og tryggja fjármagn til kynningarstarfs og taka Blóðbankanum og Blóðgjafafélagi Íslands vel í starfi þeirra.

Sveinn segir að á bilinu tvö til þrjú þúsund manns bætist í hóp blóðgjafa á ári hverju en að um helmingur þeirra verði fastir blóðgjafar. Svipaður fjöldi hætti blóðgjöf á ári hverju, m.a. vegna aldurs, og því nái Blóðbankinn rétt að halda í horfinu.

Sveinn bendir á að í dag séu engar opinberar fjárveitingar eyrnamerktar til kynningarstarfs á vegum Blóðbankans. Þvert á móti hafi fjárveitingar til Blóðbankans verið skornar niður á liðnum árum. Þetta sé algerlega óviðunandi þróun.